ଦେଶର ରାଜନୈତିକ କରିଡରରେ ଏବେ ଏକ ବଡ଼ ବିବାଦର ଆରମ୍ଭ ହେଲାଭଳି ଆଭାସ ମିଳୁଛି । କଂଗ୍ରେସ ସାଂସଦ ତଥା ଲୋକସଭାର ବିରୋଧୀ ଦଳର ନେତା ରାହୁଲ ଗାନ୍ଧୀ ଶାସକ ଦଳ ବିରୋଧରେ ସ୍ୱର ଉତ୍ତୋଳନ କରିଛନ୍ତି। ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ସଂସଦ ଭବନରେ ପୂର୍ବତନ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭବ୍ୟ ସ୍ବାଗତକୁ ନେଇ ରାହୁଲ ଗାନ୍ଧୀ କଡ଼ା ପ୍ରତିକ୍ରିୟା ପ୍ରକାଶ କରିଛନ୍ତି । ସେ ସ୍ପଷ୍ଟ ଭାବେ ଅଭିଯୋଗ କରିଛନ୍ତି ଯେ ବିଜେପି ସରକାର ଦେଶର ଅସଂଖ୍ୟ ଛାତ୍ରଛାତ୍ରୀଙ୍କ ଭବିଷ୍ୟତ ବର୍ବାଦ ହେବାର ଉତ୍ସବ ପାଳନ କରୁଛି । ଏହି ସ୍ୱାଗତ କାର୍ଯ୍ୟକ୍ରମକୁ କଡ଼ା ସମାଲୋଚନା କରି ରାହୁଲ ଗାନ୍ଧୀ କହିଛନ୍ତି, ଯେଉଁ ଶିକ୍ଷା ବ୍ୟବସ୍ଥାରେ ବ୍ୟାପକ ତ୍ରୁଟି ଏବଂ ପରୀକ୍ଷା ଦୁର୍ନୀତି କାରଣରୁ ଯୁବପିଢ଼ିଙ୍କ ଜୀବନ ଅନ୍ଧକାର ଆଡ଼କୁ ଗଲା, ସେହି ବିଭାଗର ନେତାଙ୍କୁ ଏଭଳି ସମ୍ମାନିତ କରିବା ଅତ୍ୟନ୍ତ ଦୁର୍ଭାଗ୍ୟଜନକ । ତାଙ୍କ ମତରେ ଏହା କୌଣସି ସାଧାରଣ ସମ୍ମାନ ନୁହେଁ ବରଂ ଦେଶର ମେରୁଦଣ୍ଡ ସଦୃଶ ଶିକ୍ଷା କ୍ଷେତ୍ରର ବିପର୍ଯ୍ୟୟକୁ ଖୋଲାଖୋଲି ଭାବେ ଉତ୍ସବ ପରି ପାଳନ କରିବା ସହିତ ସମାନ । ଦେଶର କୋଟି କୋଟି ଛାତ୍ରଛାତ୍ରୀ ଏସବୁ ଦୃଶ୍ୟ ନିରୀକ୍ଷଣ କରୁଛନ୍ତି ଏବଂ ଆଗାମୀ ଦିନରେ ଏହି ବ୍ୟବସ୍ଥା ପାଇଁ ଦାୟୀ ପ୍ରତ୍ୟେକ ବ୍ୟକ୍ତିଙ୍କୁ ଠିକ୍ ସମୟରେ ଜବାବ ଦେବେ ବୋଲି ସେ ଚେତାବନୀ ଦେଇଛନ୍ତି। ତେବେ ଶିକ୍ଷା କ୍ଷେତ୍ରରେ ବିବାଦ ଓ ରାହୁଲ ଗାନ୍ଧୀଙ୍କ ଆକ୍ରମଣ ପ୍ରସଙ୍ଗକୁ ନେଇ ଏବେ ସଂସଦ ଭିତରୁ ବାହାର ପର୍ଯ୍ୟନ୍ତ ରାଜନୈତିକ ଉତ୍ତାପ ବୃଦ୍ଧି ପାଇଛି । ଏଭଳି ସ୍ଥିତି କେବଳ ଦଳୀୟ ରାଜନୀତି ଭିତରେ ସୀମିତ ନାହିଁ ବରଂ ସର୍ବସାଧାରଣରେ ଦେଶର ଶିକ୍ଷାଗତ ପରିଚାଳନା ଉପରେ ଏକ ଗମ୍ଭୀର ପ୍ରଶ୍ନବାଚୀ ସୃଷ୍ଟି କରିଛି। ବିରୋଧୀ ଦଳ ଏହି ପ୍ରସଙ୍ଗକୁ ଆଧାର କରି ଆଗାମୀ ଦିନରେ ସରକାରଙ୍କୁ ଆହୁରି କ୍ରମାଗତ ଭାବେ ଘେରିବା ପାଇଁ ପ୍ରସ୍ତୁତି ଚଳାଇଛନ୍ତି ।
