ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପଶ୍ଚିମବଙ୍ଗର ପ୍ରସିଦ୍ଧ ”ଝାଲମୁଢି” ଖୁଆଇ ରାତାରାତି ଚର୍ଚ୍ଚାକୁ ଆସିଥିବା ଜଣେ ସାଧାରଣ ଦୋକାନୀ ବିକ୍ରମ ସାଉଙ୍କ ନିକଟକୁ ଗୋଟିଏ ପରେ ଗୋଟିଏ ଧମକପୂର୍ଣ୍ଣ ଫୋନ କଲ୍ ଆସୁଛି । ତାଙ୍କୁ ଓ ତାଙ୍କ ପରିବାରକୁ ବୋମା ମାଡ଼ ଏବଂ ଜୀବନରୁ ମାରିଦେବା ପାଇଁ ପାକିସ୍ତାନ ଓ ବାଂଲାଦେଶର ବିଭିନ୍ନ ଆନ୍ତର୍ଜାତୀୟ ନମ୍ବରରୁ କ୍ରମାଗତ ଭାବେ ଧମକ ମିଳୁଥିବା ଅଭିଯୋଗ ହୋଇଛି ।
ଏହି ଘଟଣା ପରେ ବିକ୍ରମ ସାଉ ଓ ତାଙ୍କ ପରିବାର ଭୟଭୀତ ହୋଇପଡ଼ିଛନ୍ତି ଏବଂ ସ୍ଥାନୀୟ ଅଞ୍ଚଳରେ ମଧ୍ୟ ଏହାକୁ ନେଇ ଉତ୍ତେଜନା ପ୍ରକାଶ ପାଇଛି । ଏହି ସମ୍ପର୍କରେ ପୋଲିସ ନିକଟରେ ଏକ ଅଭିଯୋଗ ଦାଖଲ କରାଯିବା ପରେ ତଦନ୍ତ ଆରମ୍ଭ ହୋଇଛି । ଗତ ଏପ୍ରିଲ ୧୯ ତାରିଖରେ ଝାରଗ୍ରାମରେ ଏକ ନିର୍ବାଚନ ରାଲି ସାରି ଫେରିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହଠାତ୍ ରାସ୍ତା କଡ଼ରେ ଥିବା ବିକ୍ରମଙ୍କ ଦୋକାନରେ ଅଟକି ଝାଲମୁଡ଼ି ଖାଇଥିଲେ ଏବଂ ଏହାର ଫଟୋ ସୋସିଆଲ ମିଡିଆ ପ୍ଲାଟଫର୍ମ ”ଏକ୍ସ”ରେ ମଧ୍ୟ ସେୟାର କରିଥିଲେ ।
ଏହି ଘଟଣାକୁ ନେଇ ତତ୍କାଳୀନ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହାକୁ ଭାରତୀୟ ଜନତା ପାର୍ଟିର ଏକ “ପୂର୍ବ ଯୋଜନାବଦ୍ଧ ନାଟକ” ବୋଲି କହି ତୃଣମୂଳ କଂଗ୍ରେସ (ଟିଏମସି) ଓ ବିଜେପି ମଧ୍ୟରେ ଏକ ବଡ଼ ରାଜନୈତିକ ବିବାଦ ସୃଷ୍ଟି କରିଥିଲେ। ଏହାର ଜବାବରେ ମୋଦୀ କହିଥିଲେ ଯେ ସେ ରାସ୍ତାରେ ମସଲାଯୁକ୍ତ ମୁଢ଼ି ଖାଇଛନ୍ତି ସତ, କିନ୍ତୁ ଏହାର ରାଗ ଟିଏମସିକୁ ଲାଗିଛି ।
ନିର୍ବାଚନ ସରିବା ପରେ ମଧ୍ୟ ପ୍ରଧାନମନ୍ତ୍ରୀ ନିଜର ନିକଟତମ ୫ଟି ଦେଶର ବିଦେଶ ଗସ୍ତ ସମୟରେ ନେଦରଲ୍ୟାଣ୍ଡସଠାରେ ପ୍ରବାସୀ ଭାରତୀୟମାନଙ୍କୁ ସମ୍ବୋଧିତ କରି ହସି ହସି ପଚାରିଥିଲେ, “ଝାଲମୁଢି ଏଠାରେ ମଧ୍ୟ ପହଞ୍ଚିଗଲାଣି କି?” । ଏକ ସାଧାରଣ ଖାଦ୍ୟକୁ ନେଇ ସୃଷ୍ଟି ହୋଇଥିବା ଏହି ଆନ୍ତର୍ଜାତୀୟ ବିବାଦ ଏବେ ସୁରକ୍ଷା ଏଜେନ୍ସିଗୁଡ଼ିକ ପାଇଁ ଚିନ୍ତାର ବିଷୟ ପାଲଟିଛି।
